بیر ایل بوندان اؤنجه نوامبر آیینین ۸-ده ۲۰۲۰-جی ایل تاریخده ۲۹ ایل ایشغالدان سونرا قهرهمان آزربایجان اوردوسو شوشا شهرینی ائرمهنی ایشغالیندان آزاد ائتمکله آزربایجان تاریخینه شرفلی بیر گون یازدی. قاراباغین دؤیونهن اوریی، موسیقی و اینجه صنعت بئشیی اولان شوشانین آزاد اولونماسی آزربایجانا ساواش و سیاست میدانیندا اساس هدفلرینه چاتماق ایمکانی یاراتدی کی، بونونلا آزربایجان اؤز دؤولت سرحدلرینین تمامیله برپا ائدیلمهسی سورجینه گیرمیش اولدو. محض شوشا غلبهسیندن سونراکی مرحلهده دیپلوماتیک دانیشیقلارلا ائرمهنی ایشغالچیلاری لاچین، کلبجر و آغدام بؤلگهلریندن قئیری-شرطسیز چیخاریل دیلار.
۴۴ گونلوک ایکینجی وطن محاربهسینده شوشا ایله برابر آزربایجانین دیگر ایستراتئژی اهمیتلی یاشاییش بؤلگهلری ده ایشغالدان آزاد ائدیلدی. آزاد اولونموش اراضیلریمیزده یئنیدن دالغالانان آزربایجانین دؤولت بایراغی میللتیمیزه غورور هیسسی یاشاتماقلا یاناشی، آزربایجانی رئگیونال و گلوبال پروسئسلرین اؤنملی اؤلکهلری سیراسینا داخیل ائتدی.
بو سورجده تورکییه دؤولتینین معنوی و حربی دستیینی یانینا آلا بیلهن آزربایجان دؤولتی هم ده بونو ثبوت ائتدی کی، تورک دؤولتلرینین بیرلیکده امکداشلیق ایدئیاسی گئرچک اساسلارا دایانیر.
۴۴ گونلوک ساواش سورجینده و اوندان سونراکی پروسئسلرده ایرانین آزربایجان دؤولتینه قارشی ائرمنیپرست مؤوقئیینین قارشیسیندا گونئی آزربایجاندا یاشایان چوخمیلیونلو آزربایجان تورکلرینین دیرنیشی، آزربایجان دؤولتی و اوردوسونا وئردیی دستک، جوغرافی آنلامدا ۲۰۰ ایللیک پارچالانمایا معروض قالمیش بیر میللتین اصلینده واهید بیرلیک ایدئیاسینین پارچالانمادیغینی، بوتؤو آزربایجانا دوغرو ایرلیلدیینی گؤستردی.
گونئیلی و قوزئیلی بوتون آزربایجانلیلارین مدنیت بئشیی شوشانین آزاد اولوندوغو گون میللتیمیزین ظفر گونو و بو ظفر تاریخیمیزی گئرچکلشدیرهن شهیدلریمیزین روحو، قاضیلریمیزین و مظففر آزربایجان اوردوسو قارشیسیندا سایغی دوروشو گونودور.
بیز گاماج اولاراق شوشانین غلبه گونو موناسیبتیله ایله هم ساواش، هم ده سیاست میداندا جسارت و مودریکلیک گؤسترهن آلی باش کوماندان جناب ایلهام الیئو باشدا اولماقلا بوتون دونیا آزربایجانلیلارینی، آزربایجانین مظففر اوردوسونو، قهرهمان قاضیلریمیزی تبریک ائدیر، بو تاریخی گونده شهیدلریمیزی سایغی ایله آنیر و اونلارین قهرهمانلیغینی آلقیشلاییریق.
گونئی آزربایجان میللی آزادلیق جبههسی-گاماج
۵.۱۱.۲۰۲۱