«۸ نویابئر ۲۰۲۰-جی ایلده شوشا شهرینین ایشغالدان آزاد ائدیلمهسی ایله باغلی خبرین یاییلماسی آذربایجانین حاق ساواشیندا ائرمنیستان و اونون حیمایدارلاری اوزرینده میللی ظفریندن خبر وئردی. ۴۴ گونلوک وطن ساواشیندا جبراییل، فضولی، زنگیلان، قوبادلی کیمی بؤیوک مرکزلرله بیرلیکده ۳۰۰-دن چوخ یئرلشیم بؤلگهسی دوشمهن تاپداغیندان آزاد اولوندو».
گونئی آذربایجان قوروملارینین امکداشلیق قورولونون شوشانین آزادلیغینین ۱-جی ایلدؤنومو ایله باغلی بیلدیریشینده قئید اولونور. امکداشلیق قورولونون بیلدیریشینده داها سونرا یازیلیر: «قهرهمان آزربایجان اوردوسونون ظفری شوشا زیروهسینده دایانارکن گونئی قافقازین گئوپولیتیک دورومو دا دییشدی. دؤولت و میللتیمیزین روح یوکسلیشی بؤلگهنین بوندان سونراکی بوتون سیاسی گئدیشاتینی ائتگیلییجی موستوییه قالدیردی.
شوشانین قورتولوشو ایله آذربایجان خالقی و دؤولتی ۲۰۰ ایللیک اولوسال ظفر حسرتینه سون قویدو. شوشانین قورتولوشو ایله اولوسال بایراغیمیزین دالغالانما آلانی یالنیز وطن سینیرلاریندا دئییل، بوتون دونیا اوزرینده گئنیشلهندی. دونیانین بیر چوخ بؤیوک مرکزلرینده ۱۰۰ مینلرله سویداشیمیز اللرینده دؤولت بایراغی، دیللرینده دؤولت هیمنی میدانلارا چیخدی. جوشقولو آیاقلانما، آلنی آچیق میللت گؤرونتوسو ۵۰ میلیونلوق آذربایجان تورک میللتینین دیاسپورا گوجونو آرتیردی». بیلدیریشده قئید اولونور کی، تورکییهنین آزربایجانا قارداش دستیی، ۴۴ گونلوک وطن ساواشیندا دا تورک وارلیغینین نئجه درین سویکؤکلو اولدوغونو گؤستریب: «شوشانین آزاد اولماسییلا ۳۰۰ میلیونلوق تورک دونیاسی دریندن سئویندی.
آزربایجانین ظفرینی قبول ائتمک ایستهمهیهن تئهران رئژیمی ایسه، بوتون ایمکانلارینی ائرمنیستان اوچون سفربر ائدرکهن چیرکین آنتی-تورک سیاستینی آشکارا چیخاردی. بئله کی، چوخسایلی قئیری-فارس میللتلر قاراباغین آزادلیغیندان سئوینرکهن فوندامئنتال فارسچی رئژیم یاس ایچینده بوغولدو. رئژیم، اؤنجه سلاح-سورسات دولو کامیونلاری ایله، سونرا ایسه آزربایجان جومهوریتی سینیرلاریندا قوشون توپلاماقلا آذربایجانا دوشمنچیلیینی دونیایا گؤستردی.
ایران رئژیمینیندن فرقلی اولاراق، آذربایجانین گونئیینده میللی ظفر کولیی اسیردی: «بیز آذربایجان طرفینده دئییلیک، آذربایجانین اؤزویوک! یا قاراباغ، یا اؤلوم! قاراباغ بیزیمدیر، بیزیم اولاجاق!»،- شعارلاری و پلاکاتلار فارسچی موللالار، هابئله ایرانچی موخالیفلر اوچون اؤلومجول ضربه اولدو. آذربایجان میللی حرکاتی، قوزئی وطنی اوچون یوزلرجه توتوقلو وئرهرک «بیر وطن، بیر آزربایجان» وارلیغینی اورتایا قویدو. شوشا ظفری، قاراباغین آزادلیغی بؤیوک سئوینجله قارشیلاندی».
گونئی آزربایجان قوروملارینین امکداشلیق قورولو بیان ائدیر کی، آزربایجانین ظفری بولگه ده یئنی رئاللیقلار یارادیب و ایران ایرتیجاسی بوندان سونرا «آت اوینادا» بیلمهیهجک: «تورکییه، آذربایجان و گونئی آذربایجان فاکتورو تئهران رئژیمینین هر گون ضعیفلهمهسینه یول آچاجاقدیر. تورک فاکتورو بوتون بؤلگهنین گئوپولیتیکاسینی دییشهجکدیر. زنگزور دهلیزینین آچیلماسی ایله تورک دونیاسینین اولاشیم سیستئمی بؤلگهنین یئنیدن قورولماسینا سبب اولاجاقدیر.
۸ نویابر ۲۰۲۰-جی ایل ظفری، عینی زاماندا مینلرله قهرمان عسگریمیزین قانلارینین قارشیلیغیدیر. بو تاریخ باشدا شهیدلریمیزین اوجا روحونا، مینلرجه قاضیلریمیزه، بؤیوک تورک میللتینه، آذربایجانین مظفر اوردوسونا حصر اولوموش گوندور. رئژیمین باسقیسینا باخمایاراق، گونئییمیزده میللتیمیزین قاراباغ ظفری ایله باغلی چوشقوسو حؤکم سورور. آلینان بیلگیلره گؤره، نویابر آیینین ۸-نه اؤزل ایلدؤنومو حاضرلیقلارینا باشلانیلیب. آنیم گونونده گونئیین بوتون یئرلشیم بؤلگهلرینده ظفر بایرامی قئید اولوناجاق. بیز، گونئی آذربایجان قوروملارینین امکداشلیق قورولو اولاراق کولتور باشکندیمیز شوشانین آزاد اولماسی موناسیبتی ایله باشدا آلی باش کوماندان جناب ایلهام الیئو اولماقلا بؤیوک تورک میللتینی و آذربایجان خالقینی تبریک ائدیر، شهیدلریمیزین اولو روحلاری قارشیسیندا باش اییریک.
یاشاسین (قوزئی) آذربایجان جومهوریتی! یاشاسین (گونئی) آذربایجان میللی حرکاتی!»
گونئی آذربایجان قوروملارینین امکداشلیق قورولو (امکداشلیق قورولو) آدیندان:
۱. آزادلیق جبههسی (گاماج)
۲. آذربایجان مرکز پارتییاسی (آمپ)
۳. آذربایجان میللی دیرنیش تشکیلاتی (دیرنیش)
۴. آذربایجان اؤینجی حرکاتی (آزوح)
۵. گونئی آذربایجان دئموکرات پارتییاسی (گادپ)
۶. گونئی آذربایجان ایستیقلال پارتییاسی(گایپ)
۷. گونئی آذربایجان لیبئرال دئموکرات پارتییاسی (گالدپ)
۸. گونئی آذربایجان میللی اویانیش حرکاتی (گاموح)
۹. گونئی آذربایجان دئموکراتیک تورک بیرلیگی (گادتب).
۰۴/۱۱/۲۰۲۱